رئيس مودرن سبورت يكشف مفاجأة بشأن أحمد رفعت

أوضح أحمد دياب رئيس شركة الكرة السابق لـ فيوتشر ما دار مع الراحل أحمد رفعت لاعب الفريق خلال الفترة الماضية منذ إعارته لصفوف الوحدة الإماراتي.

وقال “اي مسئول في نادي او اتحاد لما يكون عنده لاعيب مسافر كل الاجراءات اللي بيعملها انه بياخد قرار وزاري بسفر اللاعب او الفرقة لو هتلعب بره مصر، واحمد طلع له قرارين من وزارة الرياضة، قرار بسفر مع الفريق الي ليبريا وقرار تاني بمد سفره من ليبريا إلى الامارات ودي المؤسسة اللي بناخذ منها اي تصريح رياضي”.

وتابع “تمت مكالمة بعد صدور القرار الوزاري، وقولت له اطلع لان القرار الوزاري بتاع سفره للإمارات كان في ايدي ، بعد كده التعامل في الموقف القانوني بتاع احمد مش بتاع النادي دي شغلته هو”.

وأضاف “رفعت سافر بقرارين وزاريين وتصريح سفر ودا دورنا كنادي بنعمل ده، وبالتالي خرج من مصر قانوني، الخطوة اللي بعد كده مش بتاع اي نادي او مؤسسة رياضية، أنا عملت قراري الوزاري وتصريح السفر وشغلي خلص”.

وأكمل “احمد عاد إلى مصر في يناير العام الماضي واستكمل لعبه مع ناديه ولعب في الدوري وأفريقيا مع فيوتشر وبدأ الموسم ده مع مودرن ولعب ماتشات بشكل طبيعي في افريقيا والدوري”.

وأشار “احمد بعتلي بعد المشكلة دي واتكلمنا وحاولنا نحل حتى بعد ما وقع في الملعب كنت متابع مع كل الناس حالك رفعت ، ايوه ماظهرت في الصورة بس اسألوا نادر ومحمد مصيلحي ووليد دعبس”.

وتابع "وبرغم كده الرابطة لم تتجاهل احمد رفعت وخدنا وليد دعبس وروحنا لوزير الرياضة علشان نحاول نحل موضوع احمد رفعت، وبعد كده روحت لرئيس جهاز الرياضة عدة مرات لتسوية وضع احمد، وحصل حديث بينه وبين احمد:.

وشدد “لم يتم تنفيذ أي شئ مع أحمد رفعت بعد عودته في يناير 2023 هو استكمل الموسم الماضي، ولعب الموسم الحالي في الدوري، كل دا بعد رجوعه من الإمارات ولعب محليا وافريقيا”.

وواصل “أحمد رفعت بعت لي بعدما اتحط في الموقف دا واتكلمنا كذا مرة، ونقلت الكلام كله بعد ذلك لـ وليد دعبس وإدارة مودرن سبورت، مسئولية النادي تنتهي عند الحصول على التصريح الوزاري والاعتماد التانية مش في ايد النادي، التصديقات الآخرى التي تخص احمد رفعت تكون بين وزارة الرياضة وباقي الوزارات المعنية".

وأضاف “سفر احمد بناء على قرار وزاري دا شغلي وعملته، التصديقات بتاع الجيش مش بتاعتي سفره للإمارات كان قانوني جدًا طبعًا، التصديقات اللي بعد كده مسئولية وزارة الرياضة باتصالاتها مع الوزارات المعنية، ومقدرش ارمي التهم مين المتسبب في اللي حصل لاحمد رفعت ، أنا كنادي عملت شغلي القانوني، الأحاديث مع رئيس نادي الوحدة انه مش عايز يفعل بند الشراء مكانش بسبب المشكلة دي وانت عارف الكلام ده كويس”.

وواصل "حصلنا على قرار وزاري أولا بسفر أحمد رفعت.. ثم تقدمنا للحصول على قرار يوم 5 أكتوبر بعد سفره 3 أشهر، حصلنا على قرار برقم 1120 بتاريخ 5 أكتوبر لمد سفر رفعت ولم نحصل على إذن جديد لأنه خارج مصر، أحمد رفعت عاد في يناير بعد فسخ إعارته وأكمل عقده في مودرن فيوتشر".

واختم "قيل أن أحمد رفعت سافر بناءًا على وعد مش بناء على التصريح اللازم بشأن "التجنيد"، أي لاعب علشان يسافر لازم ياخد قرار وزاري بالسفر، وأحمد طلع له قرارين بـ السفر مع فيوتشر، وطلع له قرار بـ مدة سفر من ليبيريا لـ الوحدة في الإمارات، أنا قولت لأحمد مش هتركب الطيارة غير لما القرار يطلع ويبقي في ايدي وبعد كدا قولت له توكل وسافر".