نادر شوقي يكشف تفاصيل ما حدث لأحمد رفعت لاعب مودرن سبورت

أثار نادر شوقي، وكيل أعمال أحمد رفعت، جناح الفريق الأول لكرة بنادي مودرن سبورت، الذي وافته المنية اليوم السبت، الجدل بعد ساعات من وفاة اللاعب.

وقال “احمد رفعت لما احترف في الوحدة الاماراتي كان لا يحق له الخروج من البلد وفقًا للقانون، والقوانين دي ع الصغير والكبير ، فأنا ازاي لاعيب اخرج من النادي من غير التصاريح والورق بتاعي، وللاسف اتقال لنا التصاريح اتعملت وخلصت والحاجات دي طلعت ماتعملتش”.

وتابع “احمد لما طلع اتفاجئ ان الموضوع مخلصش، لو لاحظتوا احمد في اول شهر كان مكسر الدنيا بعد كده مستواه بدأ ينزل لانه كان قلقان من موقفه القانوني واللي حصل له”.

وأضاف “اسم احمد دياب تم طرحه لانه كان المسئول في فيوتشر في هذا التوقيت وهو اللي قال لنا اتحركوا لما كنا مسافرين افريقيا قال لنا اتحركوا من الترانزيت على الامارات ماراحش أفريقيا طلع على الامارات، وكان موجود عبدالظاهر السقا وعلي ماهر ورفعت كان خايف يسافر وقلقان”.

وقال “نادي الوحدة بدأ يفكر يفسخ العقد لما شافوا رفعت مش مركز بسبب المشكلة دي وبالفعل فسخنا العقد في 25 يناير وقعد هناك لحد 23 يناير ومش عارفين نعمل ايه ، وإقامته في الامارات كانت على المحك لان عقده اتفسخ خلاص”.

وأكمل “خدت نفسي ورحت جبت رفعت من المطار لانه كان خايف، قولت له روح بوس ايد والدتك وبعدين نتكلم، وكل شوية رفعت يكلمني يقولي مش عايز اعمل حاجة عكس القانون وكان قلقان جدًا، كلنا غلطانين لاني قعدت اصبر كتير لحد الولد ما وقع في الارض”.

وأشار"لما وقع في الارض أنا اتكلمت وقولت اللي غلط يصلح ، لحد ما طلع معاه يا إبراهيم واتكلم، لكن مافيش اي حد كلمنا من الرابطة او اتحاد الكورة غير حازم امام بس، ومش لاقي حد يحل القصة لحد ما وقع وبعدين مات". 

وشدد “كان حلمي مع احمد رفعت يلعب 10 دقايق بس من بعد ما وقع في ماتش الاتحاد ، مسئولو الوحدة الإماراتي كانوا على علم بأزمة أحمد رفعت وتعاطفوا معه، ومنحوه قيمة الموسم كاملًا رغم فسخ تعاقده”.

وواصل “أنا معرفش هيحصلي ايه بعد اللي قولته ولا عارف اللي قولته صح ولا غلط، هو كان عايز يقول ان دياب قال لنا روح الإمارات وهو قانونيا ماينفعش يخرج ضحكوا علينا وقالوا خلصنا الموضوع ومفيش حاجة خلصت أصلا ، هو مات ماقالش بس أنا دلوقتي اللي بقول”.

وأكمل “والدة احمد رفعت دي غلبانة اوي وشأفته بيموت مرتين، وكانت عارفه كل حاجة كانت بتكلم الناس وتتوسل ليهم تتحايل عليهم علشان يخلصوا الموضوع بتاعه”.

واختم “من شهر مارس مسمعتش صوتك يا احمد بيه دياب، وكان فيه كلام كتير انه لازم يرجع مصر ، هي مش التصديقات دي كانت لازم تتعمل قبل ما يسافر على الامارات، لا موقفه مكانش قانوني خالص بدليل انه اتوقع عليه عقوبة”.